.
.
.
.
السلام عليكم ورحمة الله وبركاته
نبعد شوية عن اللغة العربية الفصحى لان في ناس بتتعقد منى بسببها شوية
مع انى كان نفسي الموضوع ده بالذات اكتبه بالفصحى بس معلش
المهم ندخل في الموضوع
كنت هاكتب في العنوان مادى ومعنوى زي ما كلنا بنقول بس ده ليه دلاله عندى
اى شئ مادى ملموس دايما بيشدنا لان الحواس بتاعتنا بتلقطه
الشئ المعنوى بيبقى صعب اللمس لان الاحساس بيه بيحتاج قدرة معينة
ورغيت ده كله عشان اوصل لنقطة الاحساس
عارفين الانسان لما يضحى بشئ معنوى عشان يسعد حد اعظم الف مرة من لما يضحى بشئ مادى
مش هانكر اهمية الماديات بس فعلا المعنويات اعظم
لما تلاقى واحد ضحى وبعد عن انسانه بيحبها عشان عرف ان اخوه راح يتقدملها ده تسموه ايه مش احسن واغلى ما يديله فلوس
الفلوس بتروح وتيجي لكن الشئ المعنوى لما بيروح من حد عمره ما بيرجع ولو رجع مش هايبقى زي الاول
لما حد بيروح منه الامان صعب يرجعله ولو رجع مش هيبقى حاسه زي الاول هايبقى دايما مترقب وخايف يروح منه تانى
بس مش عارفة ليه الاحساس بقى شاحح اوى عند الناس اليومين دول
ناس كتير اوى مبقتش مدركه قيمة الكلمة الحلوة ولا البسمة
مبقتش مدركة يعنى ايه حد يقول لحد انا مبقتش حاسس اللى بتقوله
عارفين يعنى ايه اتنين يفقدوا الاحساس ببعض يعنى هايبقى في لما واحد فيهم يبكى التانى عمره ما هايفكر يمسح دمعته
زي ما مرة بقول لواحدة صحبتى انا هابعد عن الناس شوية قالتلى يعنى مش هاتكلمى حد ولا هتسالى على حد
قولتلها لا بالعكس بس البعد اللى اقصده ناس قليلة اللى هاتحسه الناس اللى فعلا حسانى
في ناس فاكره انى مادام باكل وبشرب وبضحك يبقى خلاص هي دي الحياة
بالعكس في حاجات لو الانسان محسهاش ميحسش انه عايش
انا ساعات بحس انى ببالغ مش عرافة ليه
بس فعلا فكروا شوية كده .. عندك ياخدوا منك عربية ولا ياخدوا منك شعورك بالرضا والراحة؟؟؟ وانتوا هاتفهوا قصدى
متخلوش الدنيا تلهيكوا عن حاجات انا شيفاها بسيطة لو عملتها عشان حد هايكون سعيد ويسعدك
وعارفين الاصعب من ده كله ايه بقى؟
لما حد يدى احساس معين لحد وبعدين يسحبه منه ياااااه بتبقى صعبة اوى
كتير اتطلب منى أتأقلم على ظروف الناس اللى بحبهم وأقدر مسؤلياتهم وظروف حياتهم اللى بتتغير
انا مقدره وكل حاجة بس انا في نقطة الناس مش فاهمينها
مهما كان الناس اللى بحبهم مشغوليين ولو غابوا عنى سنة بيفضل احساسى بيهم هو هو ولما بيرجعوا مجرد بيقولى كلمة اننا رغم ظروفنا مش نسيناكى بحبهم اكتر من الاول
بس المشكلة في الناس اللى تحس انهم معاك ومش معاك يعنى قريبين وهما بعاد
ممكن يكونوا بيعملوا اكتر من اللى كانوا بيعملوه الاول عشان يرضوك وانت مش حاسه
مقدرتش افسر النقطة دي
بس هو الاحساس .. الاحساس بجد
ربنا ما يحرمنا منه
انا عارفة انى تطرقت لكذا حاجة بس ده عيب العامية عندى مبعرفش امسك نفسي في نقطة واحدة :D
3 comments:
وعليكم السلام ورحمة الله وبركاته
هيييييييييييه
ثارة حبيبي بيرغي
:D
دانتى عايزالك قعدة وتفرغ من الشغل
كويسة العامية عشان تعرفى تتكلمى فى كذا حاجة
الفصحي هتخليكي متكتفة وهقعد اطلعلك غلطات املائية بقي بالعبيط (وش مطلع لسانه)
:D
المهم
انا فاهمة اوى ازاى بتبقي عايشة لما بعد تفقدى احساس كنتى عايشة به
وخصوصا لو الاحساس ده كان له دور مهم فى استمرارك فى العيشة
كان بيهوّن عليكي كتير اوى
ويخليكي تعملى حاجات حلوة كتير
وكان بيخلى جواكى طاقة ايجابية لحاجات كتير اوى
بس فجأة لما فقدتيه الدنيا اتغيرت اوى
وانتى نفسك مبقتيش زي الاول
مش بتكلم عليكي انتى يعني .. انا بتكلم عموما
----
مهما كان الناس اللى بحبهم مشغوليين ولو غابوا عنى سنة بيفضل احساسى بيهم هو هو ولما بيرجعوا مجرد بيقولى كلمة اننا رغم ظروفنا مش نسيناكى بحبهم اكتر من الاول
----
انا حاسة اوى بالنقطة دي
لأنى علطول بشعر بيها
اللقاء بعد الغياب
بيوضّحلك حاجات كتير اوى
من اول 5 دقايق بتعرفى
اذا كان غياب بجسمه سنين لكن احساسه زي ماهو
او غاب يادوب اسبوع ولا اسبوعين بس احساسه اتغير وبيحاول يحسسك انه طبيعي وانها انشغالات بس
بس شكلها بتبقي اشتغالات
:D
ياعم
ايوة الاحساس اللى راح ممكن منعوضوش
بس ممكن نلاقي احساس احلى منه
صح ؟
:)
عزيزتى
انا بس هعلق على حاجتين
اننا نكون بناكل ونشرب وعايشين بس مش حاسين اننا عايشين
وده لان فى شئ عاوزينه محدش عارفه ناقصنا
والحاجه التانيه ان الناس مش عارفه احنا حاسين بتيه يعنى شايفين ناحيه واحده ادامهم مننا وفى ناحية تانى مننا مش شايفنها الناحيه الحزينه الموجوعة
وبرضوا الناس اللى بتكون حولينا ونحس انهم مش معانا
كل دى حاجات جوه الانسان ومحدش بيحس بيها ويعرفها الا الانسان نفسه
ويفضل يدور على حجد يفهم اللى حسه واللى جواه يا يلاقى يا ميلقيش
بوست جميل
تحياتى
سلام
هو انتى فين مختفيه
يا رب تكونى بخير
سلام
Post a Comment